《錦發/永隆/鴻運繡莊》試齊大中小五福

跟一個中學同學都有 5-6 年無見，估唔到今次見面係一齊去試褂。我地兩個都係第一次試褂，志在影下相比較下，試下自己究竟適合著大 / 中 / 小五福。我地平日放工時間去，目標就係上海街既「錦發」+ 「永隆」喇～

 

1) 錦發繡品

 

第一站先去「錦發」，朗豪坊行前少少，非常易搵。好出名既「嫦姐」招呼緊其他客人，「倫小姐」來幫我地試褂，服務一流，任影唔嬲，比我地試齊大小中五福。

 

小五福 $680：聽到個價錢呆左，$680 真係超抵，而且望上去仲係非常新淨。因為我個樣比較細個，所以小五福都好襯我，感覺活潑一點。不過小五福多紅色，少金銀線，好似唔夠貴氣，自己心裡都係想試埋中五福先。　

 

中五福 $1280：水波腳既褂係比較短身，適合我地細細粒既女仔，望上去會顯高，相反平腳就岩本身都高既女仔著。呢件中五福都好修身，好 FIT 我，離遠影相都可以。但超近睇的話，會見到有少少甩線，金色既地方亦比較啞色。倫小姐好老實話呢D 千零蚊既褂，其實係無話「第幾手」，如果要指明第幾手，多數都二千蚊以上。

 

 

大五福 $1680：呢件就係大五福喇，褂既紅色比例明顯較少，以金銀線為主。大五福唔係每個女仔都 carry 到，如果好似我個樣咁細，著上去就會好老氣，駕馭唔到。而且呢件大五福有點奇怪，上衣金銀線既密度較高，但裙腳既密底較低，望上去有D 鴛鴦咁。

 

 

我自己唔太執著係「第幾手」，不過「錦發」千零蚊既褂都有一個共通點：就係遠睇影相 OK，近睇就稍為舊左少少。我最介意係金色比較啞色，因為我想要閃閃發亮既金色（我好變態！）

 

 

無論如何，「錦發」都係值得一去。就算你打算租「冠南華」，都可以先去「錦發」感受一下大中小五福先。而且「錦發」既服務真係好好，任試任影。阿姐睇人好叻，拎出黎既褂全部都好 FIT 身。

 

2) 永隆繡莊

 

第二站就去「永隆」，去完「錦發」再直行多一兩條街就到。好多人都話「永隆」服務好，但可能真係人夾人緣。或者我當日無帶阿媽去，佢覺得我落訂機會細，所以唔係太 SO 我。最令我唔開心既係，我朋友仔距離婚期一年兩個月，阿姐竟然話佢太早黎，唔比佢試

 

中五福 $1800：「永隆」既價錢比「錦發」略貴，當然應該再有得講下價。阿姐比我試左兩套中五福，兩件都係平腳。望上去比「錦發」新淨少少，但就唔夠短身，不太修腰。

 

 

 

錦發同永隆兩間都無叮一聲既感覺，下篇 blog 再講最後 confirm 既鴻運繡莊