《紅酒篇》EXPO 買到 $38 一枝靚紅酒

其實之前跟男友討論過好多次，我自己就想「一紅一白」，男友就想「兩紅」，屋企人仲話「兩紅一白」〔真係唔問好過問．．〕男友既理據係白酒比紅酒易入口，好快飲完，一圍一枝一定唔夠，到時無得再添就會得失客人。而且白酒要夠凍先好飲，萬一酒店收貨後唔記得雪，又多一樣麻煩野。

 

相反，紅酒係比較耐飲，每圍兩枝通常都夠。而且佢話去飲咁多次，真係唔係每對新人都有提供白酒，所以白酒唔係 must！就係咁，最後決定「兩紅」。

 

親戚朋友對飲酒都唔係太講究，志在高興下，所以我地去 EXPO 都係主攻 $38 一枝既紅酒。建議大家最後先好去試酒，我地試左 6-8 間公司，真係飲到面紅耳熱頭暈暈  

 

我地無乜研究產地同年份，主要睇即時分辨到既五個因素：

1) 色澤〔試過有一間真係好似溝左水咁，倒出黎好淺色！〕

2) 口感〔易唔易入口，會唔會好澀？〕

3) 果味〔即係夠唔夠 fruity，通常 fruity 都係比較甜〕

4) 香氣〔飲之前要聞一聞，個人比較喜歡果香。有d 會有陣辣辣地既辛香，怕怕〕

5) 招紙〔label 好睇，望落去夠大方得體〕

 

 

最後訂左 AUSCA FOOD & WINE 既「San Jose De Apalta Classic 2010」，產地係智利，紅寶石色澤，果香成熟，又易入口，用來配中餐最岩。最重要係，飲落口完全唔似係 $38 一枝既貨色！！ 酒店本身已經每圍送一枝紅酒，所以每圍再訂多一枝就夠。我地暫定 28 圍，預鬆少少訂左 36 枝。包送貨，big day 前幾日會直接送去酒店。

 

 

除左紅白酒，通常仲會擺兩枝 VSOP 烈酒，牌子唔係人頭馬，就係軒尼斯！格價後發現 UC Wine Limited 全 EXPO 最平，$448 一枝，不過要去荔枝角自取。希望幫到想搵酒既 B2B 啦～

 

updated:::

Ausca Food & Wines
http://www.ausca.com.hk/
UC Wine Limited

http://uc-wine.com/tc/default.php